O Concello acomete melloras en diversos camiños das parroquias de Burgueira, Pedornes e Santa María de Oia

O Concello de Oia acometeu obras de mellora en vías de diversas parroquias do municipio. Entre estas actuacións destacan os traballos realizados no paso de auga de Xiguente, no barrio da Portela (Burgueira), e nos camiños de Cardorrío (Pedornes), A Fonte (A Riña-Santa María de Oia) e Chavella (Santa María de Oia).

No que respecta ao Camiño de Xiguente, a actuación tiña o obxectivo de evitar os desbordamentos que adoitaban producirse nunha curva deste vial. Coas chuvias, o pequeno paso de auga que existía na zona resultaba insuficiente para conter as augas, así que se construíu un paso novo cunhas dimensións adecuadas para solucionar o problema.

Os labores contaron cun orzamento total de 25.750,95 euros. Deste total, 24.652,58 euros proveñen dun préstamo sen xuros da Deputación Provincial de Pontevedra correspondente coa anualidade de 2018. Os restantes 1.098,37 euros foron achega do Concello de Oia.

Por outra parte, tamén se efectuaron traballos de acondicionamento e mellora dos camiños de Cardorrío (Pedornes) e A Fonte (no barrio da Riña, en Santa María de Oia), os cales contaron cun orzamento de 31.944,69 euros; e se acometeu a humanización do Camiño de Chavella (Santa María de Oia) por importe de 28.113,36 euros. Ambas actuacións foron financiadas a través do Plan Concellos da Deputación, liña 1 (investimentos).